بتول حداد تستغيث في بث مباشر: "رجل مشهور" ضربني وفارض نفسه علي

كتبت- نوران أسامة:

في بث مباشر عبر حسابها على موقع "إنستجرام"، استغاثت الفنانة بتول حداد، بالحكومة لحمايتها ممن وصفته بـ"رجل مشهور" ضربها وابتزها ويصر على فرض نفسه عليها.

وقالت بتول خلال البث: "يا جماعة أنا بعمل اللايف ده، وبستغيث بقيادات الدولة، فيه شخص **** كان بتربطني بيه علاقة من فترة طويلة، والعلاقة دي رجعت تاني، والشخص ده مصمم يكون معايا بالعافية، والنهاردة كنت في خطوبة ناس صحابي، وللأسف جه، مد إيده عليا، وخدني من وسط الناس، عشان إحنا اتفقنا إننا منكملش مع بعض، عشان ده غلط، وده أنا مش عايزاه".

وتابعت: "بيستقوى عليا بمنصبه.. وأنا بستنجد بيكوا، والإنسان ده عايز ياخد مني بيتي وعربيتي، وجه ضربني وسط صحابي في الشيخ زايد".

وأضافت: "كلمت ناس في قسم الشيخ زايد ينقذوني من اللي بيحصل ده كله، أنا في الشارع، وخايفة أروح بيتي، عشان الإنسان ده ميأذينيش".

واستكملت: "جالي خطوبة اتنين من أصدقائي، وعملي مشكلة، والناس لما شافوه بياخدني من وسطهم اتخانقوا معاه، وأنا نزلت جري، قعدت في عربيتي، عشان مش عارفة أروح فين، وعشان خايفة أروح بيتي، وخايفة على نفسي، وعلى صحابي، كلمته، قلت له لو عندك مشكلة معايا، تعالى حلها معايا، وبلاش فضايح قدام الناس، أنا معروفة، وأنت معروف، وبلاش تعمل كده، ضربني في العربية، ووشي وارم، ورقبتي وارمة، لدرجة إن الناس بتوع الباركينج شالوه من فوقي قبل ما يموتني".